പുലികള്‍ മൂത്രമൊഴിക്കുന്ന സ്ഥലം.

.

കുളിമുറിയില്‍ ആണ്
എല്ലാ നിറങ്ങളും ഒലിച്ച്
മനസ്സ് പച്ച ആകുന്നത്.

ഡോക്റ്ററും
പച്ചക്കറി കച്ചവടക്കാരനും
സൈക്കിള്‍ റിക്ഷ ഓടിക്കുന്ന
ഗുജറാത്തിയും
വെള്ളത്തുള്ളിയില്‍ അലിഞ്ഞ്
ഒരു പോലെ
ആദാമിലേക്ക്
മടങ്ങിപ്പോകാറുണ്ട്.

ആശിഷ് തന്റെ മാനേജറെ
തെറിവിളിക്കുന്നതും
ഓഫീസില്‍ മസിലുപിടിച്ചിരിക്കുന്ന
സെയിത്സ് എക്സിക്യുട്ടീവ് പങ്കജ്
ഉറക്കെ പൊട്ടിച്ചിരിക്കുന്നതും
കുളിമുറിയിലേക്ക് ചെവി ചേര്‍ത്താല്‍
ഞാന്‍ കേള്‍ക്കാറുണ്ട്

ഇവിടെ
പുലികള്‍ ഇടം കാല്‍ പൊക്കി
പട്ടികളെ പോലെ
മൂത്രമൊഴിക്കാറുണ്ട്.
സിംഹങ്ങള്‍ കണ്ണാടി നോക്കി
കുരങ്ങുകളെ പോലെ പല്ലിളിക്കാറുണ്ട്.

എന്തിന്
കരടികള്‍ ലജ്ജയില്ലാതെ
മനുഷ്യനെ പോലെ രണ്ട് കാലില്‍
നടക്കാറുണ്ടത്രെ കുളിമുറികളില്‍.

ഒടുവില്‍
ഉടുപ്പുകള്‍ക്കൊപ്പം
നിറങ്ങളെല്ലാമണിഞ്ഞ്
അഛനോ അമ്മയോ
ഭാര്യയോ ഒക്കെ ആയി
പുറത്തിറങ്ങുന്നു.

പിന്നെയും
ഒരു കുളിമുറിയില്‍
പച്ച വെള്ളത്തെക്കാള്‍
പച്ചയാകുന്നത് വരെ.


--------------------------

എന്റെ ഓണ്‍ലൈന്‍ സൌഹൃദങ്ങള്‍ക്ക്..!!!

ഒന്നാം സൌഹൃദം :
====================

പ്രണയത്തിന്റെ പൊള്ളലേറ്റവന്‍
ഇന്നൊരു മഞ്ഞു കട്ടയുടെ
തെളിഞ്ഞ സ്നേഹത്തിലേക്ക്
സ്വതന്ത്രനായവന്‍.

രണ്ടാം സൌഹൃദം :
=============

പ്രണയവും സൌഹൃദവും അല്ലാതെ
നമുക്കിടയില്‍
നിര്‍വ്വചിക്കപ്പെടാത്ത ഇടമുണ്ടെന്നു
പറഞ്ഞ് തന്നവള്‍..!!

മൂന്നാം സൌഹൃദം :
==============

പിളരുന്തോറും
വളരുമെന്നു കരുതിയ
സൌഹൃദത്തിന്റെ രാഷ്ട്രീയം.
ഇടയ്ക്കെപ്പൊഴാണ്
ഈ മഴവില്‍ ചുവപ്പ്
മാഞ്ഞു തുടങ്ങിയത്.

മറ്റുസൌഹൃദങ്ങള്‍ക്ക് :
================

നന്ദി..
മൊഴിതെറ്റിയ
വാക്കിന്റെ കടവാവലുകളെ
കൊല്ലാതെ വിട്ടതിനു...!
കൈകൊണ്ട് തൊടാനാവാത്ത
ദൂരത്ത് നിന്നു
കരള്‍കൊണ്ട് തൊട്ടതിന്..!!!

-----------------------------------

വീട്

പ്രണയത്തിലേക്ക്
നടന്നു കയറിയപ്പോൾ
ഇറയത്ത്
ഊരിവെച്ച വീട്
തിരിച്ചിറങ്ങുമ്പോൾ
പാകമാകാതെ
തുറിച്ചു നോക്കുന്നു

ഒരൊറ്റ വാക്ക്

നിന്നോട് സംസാരിച്ച്
എന്റെ വാക്കുകളെല്ലാം
തീര്‍ന്നു പോകുന്നു.

എങ്കിലും,

ഞാന്‍ പറയാതെ
കാത്തു വെച്ചിട്ടുണ്ട്
നെഞ്ചിന്‍ കൂടിനുള്ളില്‍
മൂന്നക്ഷരമുള്ള
ഒരൊറ്റ വാക്ക്

ഇരുട്ടില്‍ കട്ടപിടിക്കുന്ന ചിലത്..!

പ്രണയത്തില്‍ പെട്ട്
തൂങ്ങിച്ചത്തവന്റെ മുഴുമിക്കാത്ത
അവസാനത്തെ
നിശ്വാസം കേട്ടിട്ടുണ്ടോ

അല്ലെങ്കില്‍ വെട്ടേറ്റൂ
കൊല്ലപ്പെടുന്നവന്റെ പാതിയില്‍
മുറിഞ്ഞ നിലവിളി

അതുമല്ലെങ്കില്‍
ബലാത്സംഗത്തിനിടയില്‍
പതിനാലു കാരിയുടെ
തൊണ്ടയില്‍ കുടുങ്ങിപ്പോയ
പുറത്തു വരാത്ത ഒരു തേങ്ങല്‍

ഭ്രൂണഹത്യയില്‍
അവസാനിച്ച പെണ്‍കുട്ടിയുടെ
ഇടയ്ക്കെവിടെയോ നിലച്ചു പോയ
ഒരു മിടിപ്പ്

മുഴുവനാവാത്ത ഈ ശബ്ദങ്ങളെല്ലാം
കല്ലിച്ചു നില്‍ക്കുന്നതു കൊണ്ടാവാം
രാത്രിയുടെ നിശ്ശബ്ദത
ഇത്രയ്ക്ക് കറുത്തു പോയത്.

പോസ്റ്ററൊട്ടിക്കുന്ന ആണ്‍കുട്ടി

പകുതി കീറിപ്പോയ
ഒരു പോസ്റ്റര്‍ പോലെ
വായിച്ചെടുക്കാന്‍ അപൂര്‍ണ്ണവും
അവ്യക്തവും ആണെങ്കിലും

പോസ്റ്റര്‍ മതിലിനോടെന്ന പോലെ
അവന്‍ നഗരത്തിനോട്
ഒട്ടിച്ചേര്‍ന്നിരുന്നു.


ടൈറ്റാനിക്കിനും
എന്തിരനും
മതമഹാസമ്മേളനങ്ങള്‍ക്കും
രാഷ്ട്രപിതാവിന്റെ
വട്ടക്കണ്ണടക്കും
വോട്ടഭ്യര്‍ഥനകള്‍ക്കും
ഇടയിലൂടെ അവന്റെ
വിരലുകള്‍ ഒഴുകി
നടക്കാറുണ്ടായിരുന്നു


ഓരോ ഇലക്ട്രിക് പോസ്റ്റില്‍ നിന്നും
അടച്ചിട്ട കടവരാന്തയില്‍ നിന്നും
മറന്നു വെച്ച ചുവരുകളില്‍ നിന്നും
പോസ്റ്ററുകളിലൂടെ
പുതിയ ബസ് യാത്രക്കാരെ
നോക്കി ചിരിച്ച്

നിശ്ചലതയാണ്-
ഏറ്റവും നീണ്ട സഞ്ചാരമെന്ന്
വിളിച്ചു പറഞ്ഞു.


എല്ലാ ഈര്‍ക്കില്‍
പാര്‍ട്ടികളുടെയും
പോസ്റ്ററിനു ഒരേ കൂലി
വാങ്ങുന്നത് കൊണ്ടായിരിക്കാം
അവനു രാഷ്ട്രീയമില്ലാതെ പോയത്

ഏതൊ ഒരു ഷക്കീല
ചിത്രത്തിന്റെ പോസ്റ്ററിലെ
നിറയൗവനത്തില്‍
നഖം തടഞ്ഞപ്പോഴാകാം
അവനു പ്രണയത്തെ പറ്റി
ആദ്യമായി
നഷ്ടബോധം തോന്നിയത്.


എന്നിട്ടും ,

വിശപ്പിനും പ്രണയത്തിനും
മീതെ ഉയര്‍ത്തിക്കെട്ടിയ
മതിലുകള്‍ക്കു മുകളില്‍
നമ്മള്‍ അവനെ ആട്ടിപ്പായിക്കുകയാണല്ലോ
"പരസ്യം പതിക്കരുത്" എന്ന്.


=============

സെന്‍സര്‍ കട്ട്.

ഭൂമിക്ക് ആപ്പിളിനോട്
ഉള്ളതു പോലെ
എനിക്ക് ഭാനുഏടത്തിയുടെ മകള്‍
വനജയോടും ഒരു ആകര്‍ഷണ ബലം
ഉണ്ടായിരുന്നു

വനജ കുരുത്തം കെട്ടവളാണെന്ന്
നാട്ടില്‍ ഒരു വര്‍ത്താനം ഉള്ളതിനാല്‍
ഞാന്‍ ഇതിനെ
ഗുരുത്വാകര്‍ഷണം എന്നു
വിളിച്ചാല്‍ അത് ഒരു
അപരാധമായിരിക്കും.

ന്യൂട്ടനു പകരം
ഇതാദ്യം കണ്ടുപിടിച്ചത്
മീങ്കാരന്‍ മുസ്തഫ ആയിരുന്നു
അയലയും അയലത്തെ പെണ്ണും
ചങ്ങായീടെ കണ്ണില്‍
പെടാണ്ട് പോവൂല്ലാത്രെ.

പിന്നീട് ജാതവേദന്‍
ഇതിനെ ലവ് ജിഹാദ് എന്നു വിളിച്ചു
ജാവേദ് ഞാന്‍ കാഫര്‍
ആണെന്നും പറഞ്ഞു.
ജാവേദും ജാതവേദും
ഒരക്ഷരം ഒരു സംസ്കാരം തന്നെ
മാറ്റിയെന്നു ചിന്തിക്കുന്ന .......* മക്കള്‍

അവളുടെ കണ്ണുകളില്‍
ആകാശം പ്രതിബിംബിക്കുകയും
ചുണ്ടുകളില്‍ ചെറിപ്പഴങ്ങള്‍
കായ്ക്കുകയും ചെയ്യുമായിരുന്നു

പ്രണയത്തിനു മതമില്ലന്നും
മതത്തെ കെട്ടിപ്പിടിക്കുന്നതിനെക്കാള്‍
സുഖം വനജയെ കെട്ടിപ്പിടിക്കാന്‍
ആണെന്നും ഞാന്‍
സൂര്യാ വാര്‍ത്തകളോട് പറഞ്ഞു.

ഏതായാലും മൂന്നാമത്തെ ദിവസം
വനജ അപ്പുറത്തെ വീട്ടിലെ
രാജേന്ദ്രന്റെ കൂടെ ഒളിച്ചോടിയതു കാരണം
ഞാന്‍ കയ്യും കാലും ഒക്കെ
മുഴുവന്‍ ഉള്ള രൂപത്തില്‍
തന്നെ ഇപ്പഴും ജീവിക്കുന്നു.



===============
* സെന്‍സര്‍ കട്ട്