ആദ്യം ഒരു സിഗരറ്റു കത്തിക്കുക
പിന്നെ ഒന്ന് ആഞ്ഞ് വലിക്കുക
ഇന്നത്തെ ഓര്‍മ്മകളില്‍
ഒരൊറ്റ കവിള്‍ പുക നിറക്കുക.
ഗേറ്റടച്ച റെയില്‍വെ ക്രോസ്സിങിന്റെ
നിശ്ശബ്ദതയിലേക്ക്
മടുപ്പിക്കുന്ന നിശ്വാസങ്ങളും
കുഞ്ഞു കണ്ണുകളില്‍ നിന്ന്
റെയില്‍ പാളത്തിലേക്കു
നീളുന്നകൗതുകങ്ങള്‍ക്കുമിടയില്‍
നിശ്ശബ്ദത ഭഞ്ജിച്ച് മൊബൈല്‍
ഫോണിലേക്ക് വന്ന
ഒരു റിങ്ടോണിലൂടെ
അവളുടെ ചുംബനത്തിലേക്കുള്ള
നീളം അളക്കുക.
രാത്രിവണ്ടിയില്‍
ഒറ്റപ്പെട്ട പെണ്‍കുട്ടിയുടെ
കണ്ണുകളിലെ അരക്ഷിതത്വം
വായിച്ചെടുക്കുക
അവളുടെ നെഞ്ചിലേക്ക്
അറിയാതെ ചെന്നു തറച്ച
നോട്ടത്തിന്റെ ആഴമളക്കുക.
പിന്നെയും
പ്രണയത്തിനു കുറുകെപ്പാഞ്ഞ
കറുത്ത പൂച്ചയുടെ
തിളക്കം തേഞ്ഞകണ്ണുകളൂം
കണ്ണില്‍ നിന്നുതിര്‍ന്ന
കാഴ്ചയുടെ അനുസരണക്കേടും
ഓര്‍ക്കുമ്പോഴെക്കും
സിഗരറ്റ് നിങ്ങളുടെ ചുണ്ടുകളെ
പൊള്ളിച്ചു തുടങ്ങും
അപ്പൊഴെക്കും ചുണ്ടില്‍ വെച്ച്
പൊള്ളലേറ്റ ചുംബങ്ങള്‍
ചിതറിവീഴാന്‍ തുടങ്ങും
അതുകൊണ്ട്
സിഗരറ്റു വലി ആരോഗ്യത്തിന്
ഹാനീകരമല്ല.
No comments:
Post a Comment